"Անե՛նք ավելին"
Բոլորիս հայտնի է, որ մանկատան երեխաները շատ են տարբերվում իրենց հասակակիցներից: Նրանք շատ ավելի զգայուն են, մեկուսացված, և այդ ամենը բխում է այն պայմաններից, որոնցում նրանք ապրում են: Պատմությունը ցույց է տալիս, որ մարդկային հասարակության զարգացման բոլոր շրջաններում մանկատան սաները քիչ թե շատ եղել են արհամարհված և մեկուսացված:
Այժմ ամբողջ Հայաստանի Հանրապետության տարածքում գործում են 12 մանկատներ, որոնց մեծամասնությունը գտնվում է բավականին թշվառ վիճակում:
Այդ բոլոր մանկատները օգնության կարիք ունեն: Նրանց բոլորին պետք է քաջալերել, որպեսզի նրանք պայքարեն հանուն իրենց երազանքների և նպատակների:
"Երիտասարդական նվաճումներ" (ԵՆ) կրթական հասարակական կազմակերպությունը իր գործունեության ավելի քան 12 տարիների ընթացքում իրականացրել է բազմապիսի կրթական ծրագրեր՝ հիմնականում աշխատելով դպրոցների և բարձրագույն կրթական հաստատությունների հետ: Այս անգամ ԵՆ-ն ձեռնամուխ եղավ իրականացնել "Անե՛նք ավելին" ծրագիրը, որի հիմնական նպատակն է բարելավել մանկատներում ապրող երեխաների և երիտասարդների կյանքը՝ ի հայտ բերելով նրանց կարիքները և խնդիրները ծրագրի շրջանակներում ստեղծված էլեկտրոնային կայքի միջոցով:
Ծրագրում ընդգրկված են Շիրակի և Լոռու մարզերի մանկատները՝ Գյումրու "Երեխաների տուն" և "Հույս" մանկատները և Վանաձորի մանկատունը:
Մենք համոզված ենք, որ ծրագիրը կնպաստի մանկատների բարելավմանը, ինչպես նաև կվերացնի անջրպետը մանկատան սաների և հասարակության միջև, և նրանք իրենց կզգան հասարակության լիիրավ անդամներ:
Երիտասարդները մեր երկրի ապագան են, և մենք պետք է առանց ջանքեր խնայելու աջակցենք և օգնենք նրանց հասնել իրենց առջև դրված բոլոր նպատակներին: