Գյումրու Ֆ. Նանսենի անվան մանկատուն

Ֆ. Նանսենի անվան մանկատունը ստեղծվել է 2000 թվականին ՀՀ աշխատանքի և սոցիալական հարցերի նախարարության համակարգում: Մանկատան գործունեության առարկան մանկատանը խնամվող՝ մինչև 18 տարեկան երեխաների խնամքի և դաստիարակության ապահովումն է, իրավունքների և օրինական շահերի պաշտպանությունը, հագուստով, սննդով և այլ կենցաղային իրերով ապահովումը:

Համաձայն ՀՀ աշխատանքի եւ սոցիալական հարցերի նախարարության կողմից ընդունված որոշման 2010 թվականի սեպտեմբերից մանկատունը վերածվել է գիշերօթիկ դպրոցի: Երեխաների մի մասը տեղափոխվել է ՀՀ-ի այլ մանկատներ, իսկ մյուս մասը կշարունակի իր կրթությունը նույն կրթահամալիրում:

Վանաձորի մանկատուն

Վանաձորի մանկատունը ստեղծվել է 1997 թվականին ՀՀ աշխատանքի և սոցիալական հարցերի նախարարության համակարգում: Մանկատան գործունեության առարկան է մանկատանը խնամվող մինչև 18 տարեկան երեխաների սոցիալ-հոգեբանական վերականգնման աշխատանքների իրականացումը, նրանց իրավունքների և օրինական շահերի պաշտպանությանն աջակցումը, սննդով, հագուստով և կենցաղային իրերով ապահովումը, խնամքի և դաստիարակության ապահովումը, ուսուցման և բժշկական օգնության կազմակերպումը:

Վանաձորի մանկատան մանկավարժներն ու դաստիարակները, ելնելով երեխաների մտավոր և ֆիզիկական հնարավորություններից, ընդհանուր զարգացման ծրագրի շրջանակներում առաջնորդվում են անհատական զարգացման ծրագրերով:

Երեխաների մանկատանը հայտնվելու հիմնական պատճառներն են՝ ընտանիքների քայքայումը, ծնողների բացակայությունը հարնրապետությունից, սոցիալական ծանր պայմանները, բնակարանի բացակայությունը:

Մանկատան դպրոցահասակ սաները հաճախում են Վանաձորի թիվ 3 օժանդակ և թիվ 28 միջնակարգ դպրոցներ: Իսկ չափահաս դառնալուց հետո նրանցից շատերը սովորում են բարձրագույն կրթական հաստատություններում: